Katrín Jakobsdóttir forsætisráðherra ætlar sér að hlaupa 10 kílómetra í Reykjavíkurmaraþoni Íslandsbanka en hún hefur ákveðið að hlaupa til styrktar Alzheimersamtakanna.

„Ég hef stundum deilt með ykkur á þessari síðu hlaupasjálfinu mínu. Þið þekkið kannski forsöguna en ég fór að hlaupa að ráði eftir fótbrot árið 2020 og var það fyrst og fremst fyrir einbeitta hvatningu Þórunnar Rakelar Gylfadóttur sem hefur fylgt mér æ síðan. Ætlunin var að hlaupa 10 kílómetra í Reykjavíkurmaraþoninu í fyrra en því var eðlilega aflýst vegna heimsfaraldurs,“ segir Katrín í færslu sem hún birti á Facebook-síðu sinni.

Katrín segist ekki hafa verið alveg jafn dugleg að æfa sig eins og í fyrra. „Ég ætla samt að láta á það reyna að hlaupa og sjá hvort ég næ ekki í mark (segjum sem minnst um tímann).“

Eins og áður segir hleypur Katrín fyrir Alzheimersamtökin en hún segir að það sé alltaf erfitt að velja gott málefni til að styrkja. Þá segir hún frá því hvers vegna hún valdi að styrkja þessi samtök. „Innblásturinn eru Magnús Karl Magnússon og Ellý Katrín Guðmundsdóttir en Ellýju þekki ég frá gamalli tíð,“ segir Katrín.

„Hún kenndi mér svo ótal margt um sjálfbærni og umhverfisvernd þegar ég varð formaður umhverfis- og heilbrigðisnefndar Reykjavíkurborgar en þá var hún yfir umhverfissviði borgarinnar. Og þá urðu ýmis framsækin mál að veruleika. Magnús og Ellý hafa opnað augu okkar margra fyrir alzheimer-sjúkdómnum með opinskárri umræðu, meðal annars á þessum miðli.

Að lokum segir Katrín að það sé ekkert annað í stöðunni en að klára að hlaupa tíu kílómetranna.

„Þannig að nú er bara að klára að hlaupa þessa tíu kílómetra. Þessi tvö hlupu með mér í síðustu viku og hafa verið óþreytandi að hjálpa mér reglulega á æfingum. Á miðvikudaginn hlupum við næstum því tíu kílómetra og eins og sjá má á myndinni reyndi það töluvert á! En nú verður ekki snúið aftur!“