Skotárásin í Miðvangi í Hafnarfirði í morgun er rannsökuð sem tilraun til manndráps, samkvæmt tilkynningu frá lögreglunni. Karlmaður á sjötugsaldri er í haldi lögreglu grunaður um verknaðinn. Hann er talinn hafa skotið á tvo kyrrstæða bíla, annar var mannlaus, en maður og barn var í hinum bílnum, samkvæmt heimildum Vísis.

Tilkynning lögreglu um málið er eftirfarandi:

„Skotárás á Miðvangi í Hafnarfirði í morgun er rannsökuð sem tilraun til manndráps. Karlmaður á sjötugsaldri er í haldi lögreglu grunaður um að hafa skotið á tvær kyrrstæðar bifreiðar á bifreiðastæði á milli fjölbýlishúss og leikskóla. Önnur bifreiðin var mannlaus en hin ekki, og þykir mikil mildi að ekki fór verr.

Rannsókn málsins er á frumstigi og ákvörðun um gæsluhaldvarðhaldskröfu eða önnur úrræði gagnvart manninum liggur ekki fyrir.

Ekki er hægt að veita frekari upplýsingar að svo stöddu.“