Fyrir nokkrum dögum vísaði Sergey Lavrov, utanríkisráðherra, því á bug að Pútín sé veikur og hvað þá við dauðans dyr.
En hvað gerist ef Pútín deyr í náinni framtíð? Hver tekur við forsetaembættinu?
Ef Pútín deyr eða verður af einhverjum ástæðum ófær um að sinna skyldum sínum sem forseti þá kveður rússneska stjórnarskráin á um að það sé forsætisráðherrann sem komi í hans stað.
Mikhail Misjustin hefur gegn embætti forsætisráðherra síðan í janúar 2020 og tekur því við af Pútín ef hann deyr eða verður ófær um að sinna skyldum sínum.
Misjustin er 56 ára hagfræðingur. Hann var forstjóri skattsins í um áratug áður en Pútín útnefndi hann sem forsætisráðherra.
Jakub M. Godzimirski, sem rannsakar málefni Rússlands hjá Norsk Institut for Udenrigspolitik, sagði í samtali við Dagbladet að Misjustin sé formlega númer tvö og muni taka við forsetaembættinu ef Pútín fellur frá. Hann sagði að völd og raunveruleg áhrif Misjustin séu takmörkuð og verði það áfram þótt hann taki við forsetaembættinu.
„Það er enginn sem trúir að Misjustin hafi komið að mikilvægum ákvörðunum, honum er haldið fyrir utan innsta hringinn þar sem menn á borð við Sergei Shoigu varnarmálaráðherra, Anton Vajno starfsmannastjóri, og Sergei Naryshkin yfirmaður SVR-leyniþjónustunnar eru,“ sagði hann.
Lítið er vitað um Misjustin. Samkvæmt upplýsingum á vefsíðunni Meduza, sem stjórnarandstæðingar reka, eru eignir Misjustin sem nemur um 7 milljörðum íslenskra króna. Hann er kvæntur og á þrjá syni. Hann hefur áhuga á íshokkíi og spilar á píanó og hefur skrifað popplög.