Fregnir fyrr í dag um að bandaríska skyndibitakeðjann Wendy´s væri á leið til Íslands virðast hafa verið byggðar á sandi. Vísir greindi frá því fyrr í dag að bandaríska keðjan ætlaði að opna 3-4 útibú hérlendis og auglýsti eftir 60 starfsmönnum sem og heppilegum staðsetningum. Byggðist fréttin á fréttatilkynningu til fjölmiðla sem og tilkynningu á íslenskri heimasíðu Wendys.is.
Stuttu síðar var fréttin síðan leiðrétt og tekið fram í fyrirsögn að um falsfréttir væru að ræða og að listamaðurinn Odee, Oddur væri enn á ný að sprella með stofnun fyrirtækja hérlendis.
Þetta er sumsé ekki í fyrsta sinn sem Odee, Oddur Eysteinn Friðriksson, freistar þess að plata fjölmiðla og almenning.
Í nóvember 2020 var tilkynnt um stofnun nýs lággjaldaflugfélags, MOM air, sem vakti talsverða athygli enda var fullhönnuð vefsíða tiltæk auk þess sem fréttatilkynningar voru sendar á fjölmiðla. Átti að afhjúpa á sérstökum blaðamannafundi hver stæði á bak við félagið nokkrum dögum síðar en fyrir það grófu fjölmiðlar upp Odee væri á bak við gjörninginn þó að hann þvertæki fyrir aðkomu sína fyrst um sinn.
Hann viðurkenndi það þó um síðir og reyndist gjörningur vera hluti af verkefni hans í Listaháskóla Íslands. Segja má að gjörningurinn hafi heppnast vel því á skömmum tíma hafði hann fengið fjölda kvartana vegna galla vefsíðunnar, þúsundir bókana, þúsundir fylgjenda á Instagram, fjöldi atvinnuumsókna hafi borist honum auk alþjóðlegrar umfjöllunar.
Þegar flett var upp á íslenska heimasíðu á ISNIC-skránni sást að einstaklingurinn OEF3-IS var skráður fyrir síðunni en það er sami aðili og var skráður fyrir heimasíðu MOM air og heimasíðu listamannsins Odee.
Í stuttu spjalli við blaðamann harðneitar þó Odee að um gjörning sé að ræða. Hann sé aðeins starfsmaður á plani.
„Ég var bara ráðinn til þess að hjálpa þeim með þessa heimasíðu og markaðsherferð og get sagt að þetta er raunverulegt fyrirtæki, kompaní, batterí sem er að fara að opna,“ segir Odee.
„Ég er búinn að vera að vinna í heimasíðugerð og að aðstoða fyrirtæki með markaðsefni og þetta er bara eitt af þeim verkefnum. En annars er ég ekki talsmaður fyrir fyrirtækið,“ bætir hann svo við en segist vel skilja að fólk sé tortryggið eftir MOM air-uppátækið.
