Biskup Íslands, Agnes M. Sigurðardóttir, hefur veitt séra Davíð Þór Jónssyni formlegt tiltal vegna skrifa hans á Facebook í gær. Þetta kemur fram í yfirlýsingu hennar og eru skrif Davíðs þar kölluð „harkaleg og ósmekkleg“.

„Biskup Ísland hefur gagnrýnt áform íslenskra yfirvalda um fyrirhugaðar fjöldabrottvísanir hælisleitenda sem fest hafa rætur hér á landi.

Prestum þjóðkirkjunnar ber að haga málflutningi sínum málefnalega og meiða ekki með orðum. Í ljósi þessa hefur biskup Ísland veitt sr. Davíð Þór Jónssyni formlegt tiltal fyrir þau harkalegu og ósmekklegu skrif sem hann viðhafði á facebook-vettvangi sínum 24. maí sl. Málinu telst lokið af hálfu biskups.

Eftir stendur sem meira máli skiptir ákall biskups Íslands um mannúð og mildi þegar kemur að málefnum hælisleitenda.“

Agnes lýsti því yfir í samtali við mbl.is í gær að ummæli Davíðs, um að flokksmenn Vinstri grænna eigi vísa vist í helvíti, stangist á við siðareglur presta. Hún sagði í samtali við Vísi í dag að málið sé litið mjög alvarlegum augum af Þjóðkirkjunni og hefi Davíð brotið siðareglur muni hann fá tiltal.

Davíð Þór fór hörðum orðum um Vinstri Græn í gær. Kallaði hann meðal annars ríkisstjórnina „fasistastjórn VG“ og sagði þau hafa ákveðið að „míga á“ barnasáttmála sameinuðu þjóðanna sem þau hafi logið því að hafa lögfest. Færslan var skrifuð vegna aðgerðarleysis stjórnvalda gagnvart fjöldabrottvísunum sem standa til á næstunni þar sem börnum verði vísað úr landi yfir í mun verri aðstæður á Grikklandi.

„Þinglið og ráðherrar VG eru ekki lengur bara meðsek um glæpi þessarar ríkisstjórnar gegn mannúð og góðu siðferði, þau eru einfaldlega sek eins og syndin. Það er sérstakur staður í helvíti fyrir fólk sem selur sál sína fyrir völd og vegtyllur.“

Sjá einnig: Björn Ingi skammar Davíð fyrir að hjóla í fyrrverandi sambýliskonu sína – „Presturinn sjálfur! Ömurlegt“