Héraðssaksóknari hefur fellt niður mál er varðar kæru íslenskrar konu á hendur knattspyrnumönnunum Aroni Einari Gunnarssyni og Eggerti Gunnþóri Jónssyni fyrir nauðgun. Þetta staðfestir Einar Oddur Sigurðsson lögmaður Arons Einars  í samtali við DV.

Einar segir að tilkynning frá héraðssaksóknara hafi borist þess efnis í dag. Konan lagði fram kæru síðasta haust og sakaði Aron og Eggert um að hafa nauðgað sér í kjölfar landsleiks í Kaupmannahöfn árið 2010.

„Þetta er ánægjuefni fyrir þá. Þetta er það sem þeir hafa búist við og að vönduð rannsókn myndi leiða það í ljós að þetta væri ekki líklegt til að fá framgöngu,“ segir Einar Oddur í samtali við DV en Aron og Eggert sendu frá sér yfirlýsingar síðasta haust og neituðu sök í málinu.

Sú sem lagði fram kæruna hefur nú einn mánuð til að fara fram á það við ríkissaksóknara að málið sé skoðað nánar.

Aron Einar er leikmaður Al-Arabi í Katar en hann hefur verið úti í kuldanum hjá íslenska landsliðinu eftir að málið kom upp. Eggert Gunnþór Jónsson er leikmaður FH en honum var gert að stíga til hliðar um miðjan apríl vegna málsins.