Ákæra gegn Brynjari Joensen Creed fyrir alvarleg kynferðisbrot gegn fimm ólögráða stúlkum nær aðeins yfir hluta af þeim brotum sem hann er grunaður um. Þetta kemur fram í frétt á RÚV í dag.

Brynjar er ákærður fyrir alls 17 brot gegn fimm stúlkum, sem varða nauðganir, klámfengin samskipti í gegnum Snapchat, dreifingu á klámfengnu efni af stúlkunum, misneytingu, blekkingar og fleira.

Réttað var í máli hans 28. apríl en þess er vænst að dómur falli í málinu þann 19. maí næstkomandi.

Brynjar hefur setið í gæsluvarðhaldi frá því hann var handtekinn þann 8. nóvember síðastliðinn. Eins og DV greindi frá í gær var hann handtekinn á vinnustað sínum, en hann starfaði í stóru heildsölufyrirtæki. Lagt var hald á vinnubíl hans og meðal annars notast við upplýsingar úr ökurita við rannsókn málsins. Talið er að hluti brotanna hafi átt sér stað í bílnum.

Í frétt RÚV kemur fram að fjölga hafi þurft stöðugildum í Barnahúsi vegna rannsókna á meintum brotum Brynjars. Samkvæmt heimildum DV hafa tugir barna verið kallaðir þangað til viðtala vegna meintra brota Brynjars. Talið er að hann hafi verið í samskiptum við yfir 200 ólögráða stúlkur í gegnum Snapchat.

Kolbrún Benediktsdóttir héraðssaksóknari upplýsir í frétt RÚV að aðeins hafi verið ákært fyrir hluta af meintum brotum Brynjars þar sem ekki sé heimilt að halda sakborningum í gæsluvarðhaldi lengur en í tólf vikur án þess að ákæra sé birt. Sé ákæra ekki gefin út innan þess tíma sé sakborningum sleppt úr haldi.

Brynjar er fæddur árið 1970. Hann er frá Vopnafirði en hefur undanfarin ár búið í Reykjavík. Er hann fráskilinn og á uppkominn börn.

Vinnufélagi hans í heildsölufyrirtækinu lýsir honum sem dulum, sérkennilegum og lágmæltum. Hann segir hann hafa verið áberandi utan við sig:

„Hann klessti vinnubíl illa og var stundum að bakka á eða keyra utan í. Eins og hann væri ekki með hugann við umhverfið. Núna veit maður hvað hann var að hugsa um. Ógeðslegt.“

Brynjar var trúnaðarmaður fyrir sinn vinnustað hjá VR. Hann hefur tekið þátt í almenningshlaupum og hlaupið til styrktar góðum málefnum.

DV hefur einnig eftir ónafngreindum aðila sem þekkir vel til málsins að það hafi reynt gífurlega mikið á þá sem hafa unnið að því og afleiðingarnar á brotaþola gætu varað ævilangt.