Maðurinn sem fjölmiðlar greindu frá í gær að væri ákærður fyrir stórfelld kynferðisbrot gegn börnum heitir Brynjar Joensen Creed. Hann er fæddur árið 1970 og er fjölskyldufaðir frá Vopnafirði. Þar á Brynjar lögheimili en hann hefur búið á höfuðborgarsvæðinu undanfarin ár.
Samkvæmt ákæru er Brynjar sakaður um mjög alvarleg brot gegn fimm ólögráða stúlkum. Brotin eru framin á tímabilinu 2018 til 2021 en meirihluti brotanna var framinn á síðasta ári. Þau fela í sér klámfengin samskipti í gegnum samskiptaforritið Snapchat, nauðgun í bíl og á gistihúsi, börnin véluð til að nota kynlífshjálpartæki, taka upp á myndskeið og senda Brynjari, sem og dreifingu á kynferðislegu efni með þolendunum til annarra.
Samkvæmt heimildum DV er Brynjar grunaður um að hafa áreitt margfalt fleiri börn en hann er ákærður fyrir brot gegn. Hann hefur undanfarið hálft ár setið í gæsluvarðhaldi á Hólmsheiði. Hafa meint brot hans vakið mikinn óhug meðal íbúa á Vopnafirði sem þekkja til mannsins.
Aðalmeðferð í málinu var fyrir Héraðsdómi Reykjaness þann 28. apríl síðastliðinn. Gerðar eru einkaréttarkröfur á manninn fyrir hönd stúlknanna fimm þar sem krafist er skaðabóta frá 2,5 og upp í 5 milljónir fyrir hvert barn. Dómsuppkvaðning verður þann 19. maí næstkomandi.
