Hermennirnir frá Tsjetsjeníu eru venjulega undir stjórn Ramzan Kadyrov, forseta Tsjetsjeníu, en hann er einn tryggasti stuðningsmaður Pútín. Þeir eru þekktir fyrir grimmd og miskunnarleysi og eru mjög bardagareyndir. Jótlandspósturinn segir að mörg þúsund hermenn frá Tsjetsjeníu séu komnir til Úkraínu.
Le Figaro segir að mörg þúsund hermenn Kadyrov hafi sést við kjarnorkuverið í Tjernóbyl. Fáni þeirra hefur einnig sést nærri höfuðborginni Kyiv og má því ætla að þeir séu til staðar þar.
Hernaðarsérfræðingar segja að hermennirnir hafi ekki komið með skriðdreka heldur brynvarin léttari ökutæki. Þeir eru sérfræðingar í götubardögum og hlutverk þeirra verður hugsanlega að tryggja að ró komist á í stærri borgum Úkraínu ef Rússum tekst að ná þeim á sitt vald, þar á meðal Kyiv. Venjulega eru þeir lífverðir Kadyrov sem hefur stýrt landi sínu með járnhnefa síðan hann komst til valda árið 2007 eftir borgarastríð í landinu þar sem Rússar jöfnuðu höfuðborgina Grosnjij við jörðu. Talið er að um 300.000 manns hafi hrakist frá heimilum sínum og að á milli 100.000 og 200.000 hafi fallið í þeim tveimur borgarastyrjöldum sem voru í landinu eftir hrun Sovétríkjanna. Kadyrov hefur orð á sér fyrir að vera miskunarlaus og grimmur einræðisherra.
Á myndbandsupptöku sem úkraínski herinn sendi nýlega frá sér sjást hermenn frá Úkraínu dýfa skotfærum sínum í svínafitu til að leggja áherslu á að trúarbrögð tengist átökunum einnig en hermennirnir frá Tsjetsjeníu eru múslimar.
Liðsmenn Wagnersveitanna eru einnig sagðir vera komnir til Úkraínu. Sveitunum er stýrt af Jevgenij Prigoshin, sem er stundum nefndur kokkur Pútín en hann hefur auðgast mikið á því að selja rússneska hernum mat sem og rússneskum skólum. Hann og Pútín eru nánir vinir en það skýrir hugsanlega ábótasama samninga hans við herinn og skóla um sölu á mat.
Liðsmenn Wagnersveitanna tóku þátt í hernámi Krím 2014 og hafa barist með aðskilnaðarsinnum í austurhluta Úkraínu. Þeir hafa einnig verið sendir til átakasvæða víða um heim.
