Maður var í gær dæmdur í fjögurra ára fangelsi og til greiðslu þriggja milljóna króna miskabóta vegna frelsissviptingar og hrottafullrar líkamsárásar gagnvart konu sem hann hafði keypt vændi af. Árásin var kærð til lögreglu þann 21. apríl árið 2021. Dómurinn var kveðinn upp í Héraðsdómi Reykjavíkur.
Maðurinn var sýknaður af þeim hluta sem ákærunnar sem varðaði kynferðisbrot önnur en vændiskaup, þ.e. nauðgun sem samkvæmt ákæru átti sér stað eftir að umsömd kynmök höfðu átt sér stað. Þótti dómara þessi atriði ekki fullsönnuð þar sem orð stæðu gegn orði og vitnisburður vitna væri byggður á frásögn konunnar.
Áverkavottorð og fleiri sönnunargögn þóttu hins vegar sanna annað ofbeldi mannsins gegn konunni. Bankayfirlit sönnuðu greiðslu fyrir kynlífsþjónustu en maðurinn greiddi konunni 10 þúsund krónur í leigubílakostnað og 40 þúsund krónur fyrir kynlífsþjónustu með því að millifæra á reikning hennar. Konan kom á heimili mannsins sem bjó í litlu herbergi.
Eftir að maðurinn hafði haft sáðlát krafðist hann endurgreiðslu, en konan sagðist ekki geta millifært á hann þar sem hún hefði látið hann millifæra á reikning annars aðila, læsti hana inni í herberginu, tók af henni síma, tók hana hálstaki og „sló hana endurtekið í andlit og búk, með þeim afleiðingum að A hlaut brot á augntóttargólfi og á vanga- og kinnkjálkabeinum vinstra megin, mar í andliti, á hálsi og á vinstri upphandlegg, húðblæðingar á hálsi og punktblæðingar í andliti og í slímhúðum augna og í munnslímhúð, og yfirborðsáverka í andliti og á búk,“ eins og segir í ákæru en dómari taldi þennan hluta ákærunnar fullsannaðan.
Maðurinn var sem fyrr segir dæmdur í fjögurra ára fangelsi og til greiðslu þriggja milljóna króna í miskabætur en konan krafðist sex milljóna.
