Í gær komst Héraðsdómur Reykjavíkur að þeirri niðurstöðu að brottvísun Hussein Hussein og fjölskyldu hans frá Íslandi til Grikklands hafi verið ólögleg. Fjölskyldan, sem er upprunalega frá Írak, var flutt með ærnum tilkostnaði af landi brott í skjóli nætur af íslenskum yfirvöldum og vakti aðgerðin mikla reiði í samfélaginu.
Nú hefur dómur Héraðsdóms Reykjavíkur verið birtur á vef dómstólsins og þar má lesa um hryllilega sögu fjölskyldunnar og ástæður þess að þau hafi ákveðið að flýja heimaland sitt.
Í dómsorði kemur fram að Hussein hafi verið bundinn við hjólastól frá unglingsaldri vegna sjúkdóms, auk þess sem hann hafi lent í alvarlegu slysi þegar hann var barn. Hann greindi frá því fyrir dómi að hann og fjölskylda hans hafi orðið að flýja Írak vegna ofsókna og ofbeldis sem þau hafi orðið fyrir. Upphaf þess hafi verið hjónaband eða ástarsamband bróður Hussein sem hafi á laun kvænst stúlku án leyfis fjölskyldu hennar og þanni gvegið að heiðri fjölskyldu stúlkunnar.
Það hafi flækt málið enn frekar að fjölskyldurnar hafi tilheyrt hvor sínum trúarhópnum, önnur súnní-múslimum og hin sjía-múslimum. Bróðir Hussein og brúður hans hafi í kjölfarið farið í felur. Fjölskylda stúlkunnar hafi er upp komst um hjónabandið rænt eiginkonu bróðursins og beitt hana ofbeldi. Þá hafi þau drepið föður Hussein , beitt hann sjálfan pyndingum og rekið hann og fjölskyldu hans af heimili þeirra. Hussein sagði fyrir dómi að hann og faðir hans heitinn hafi verið beittir grófu ofbeldi í Írak, meðal annars var hann pyntaður með rafmagni og skilinn eftir í ruslagámi þar sem árásarmennirnir töldu hann dauðan.
Allt þetta hafi leitt til alvarlegra líkamlegra og andlegra vandamála fyrir Hussein. Í kjölfar þessara hræðilegu atburða hafi hann og fjölskylda hans flúið til Tyrklands og þaðan komist til Grikklands í þriðju tilraun eftir miklar svaðilfarir en þar hafi aðstæður verið ömurlegar og Hussein ekki notið neinna réttinda sem fatlaður einstaklingur. Þaðan var förinni svo heitið til Íslands.
Í dómnum kemur fram að frásögn Hussein sé samkvæmt vottorði sálfræðings trúverðug og að hann hafi sterkt einkenni áfallastreituröskunar, alvarleg einkenni þunglyndis og kvíða sem og alvarleg einkenni streitu. Þá glími hann við marþættan og alvarlegan heilusfarsvanda.
