Tölvugerð mynd af andliti ungrar íslenskrar konu frá 16. öld sýnir skelfilega afleiðingar sárasóttar. Myndin var unnin í tengslum við rannsókn Háskólans í Adelaide á sárasótt en áverkar á höfuðkúpu ungu konunnar vöktu athygli þeirra. Hauskúpan var skönnuð inn með þrívíddarskanna og þannig aðgengileg rannsakendunum.

Hauskúpa konunnar var grafin upp á Skriðuklaustri fyrir rúmum áratug og er varðveitt á Þjóðminjasafninu. Konan virðist hafa verið á þrítugsaldri þegar hún lést en ljóst er að líf hinnar ungu konu hefur ekki verið auðvelt. Auk sárasóttarinnar glímdi hún við slitgigt og vankölkun glerungs sem að öllum líkindum var afleiðing af næringarskorti.

Fjallað var um rannsóknina og íslensku konuna á vef Live Science í vikunni. Haft er eftir einum aðstandanda rannsóknarinnar, hinum brasilíska Cicero Moraes sem bjó til myndina tölvugerðu, að það sé í raun sláandi að sjá einhvern sem hefur verið svona illa haldinn af sárasótt, þar sem skaðinn hafi náð inn að beini. Um sé að ræða lokastig sjúkdómsins og þó að ástandið geti verið banvænt sé ekki hægt að fullyrða að sársótt hafi dregið konuna til dauða.

„Sjúkdómurinn hafði þó mikil áhrif á lif hennar,“ er haft eftir Moraes.

Hér geta áhugasamir kynnt sér rannsóknina