Reykjavíkurborg hefur sent frá sér tilkynningu vegna klórslyssins í Grafarvogslaug sem átti sér stað í gærkvöldi.

Segir í tilkynningu að það sé rangt sem kom fram í fjölmiðlum í gærkvöldi, að starfsmenn hafi verið að þrífa gufuna eða gleymt að loka þar hurð. Hið rétta sé að gestur sundlaugarinnar hafi farið inn í lokaða geymslu og sótt þar klór sem hann taldi vera vatn og hellti á steina í gufubaðinu. Þar sem klór geti verið skaðlegt öndunarfærum hafi nokkrir farið til skoðunar á bráðamóttöku og ljóst er að um slys hafi verið að ræða. Lögregla hafi rætt við alla hlutaðeigandi.

Haft er eftir forstöðumanni Grafarvogslaugar, Hrafni Þór Jörgenssyni, að atvikið sé harmað.

„Við hörmum að þetta óhapp hafi átt sér stað. ÍTR fer ítarlega yfir málið og gripið hefur verið til viðeigandi ráðstafana.“