Upptökur úr eftirlitsmyndavélum Bankastræti Club ganga nú manna á milli í netheimum. Umræddar upptökur sýna árásina sem þar átti sér stað á fimmtudagskvöld.

Á annarri upptökunni sést hópur manna ráðast niður á neðri hæð skemmtistaðarins og á þeirri seinni má sjá hópinn ráðast inn í herbergi þar sem þolendur árásarinnar var að finna.

Fjöldi manns situr nú í gæsluvarðhaldi vegna málsins,  tólf nú þegar og er búist við að tveir til viðbótar bætist í þann hóp. Tæplega þrjátíu aðilar hafa verið handteknir vegna málsins og er nokkurra til viðbótar leitað.

Ógnvekjandi skilaboð hafa einnig gengið milli fólks í dag þar sem varað er við hefndarárás í miðbænum næstu helgi og er því haldið fram að fjölmennt lið muni mæta vopnað í bæinn til að ná fram hefndum á þeim sem báru ábyrgð á árásinni og jafnvel á saklausum borgurum. Lögregla veit ekki með sannleiksgildi þessara áforma en hefur þó boðað stóraukið eftirlit í miðbænum um helgina.

Eins hefur verið greint frá því að málsaðilum sem og fjölskyldum þeirra hafi verið hótað og jafnvel ráðist að heimili fólks með bensínsprengum. Mikill uggur er í fólki vegna málsins.

Við vörum við efni myndbandanna hér að neðan þar sem um alvarlega árás var að ræða.