Sara var velmegandi lögmaður og gekk allt í haginn á veraldlega sviðinu en á sama tíma hellti hún í sig eintómu vodka daglega til að deyfa sig. Hún segir að hugurinn hafi haldið sér í heljargreipum og að hún hafi verið undirlögð af sjúkdómum og verkjum. „Fyrsta opinberunin var sú að sjá að rót veikinda minna var það að ég elskaði ekki sjálfa mig, að ég í rauninni var djúpt sokkin í sjálfshatur,“ segir Sara í þættinum.
Aðspurð um það hvernig hún fékk þessa opinberun segir Sara að það hafi gerst smátt og smátt í gegnum bataferðalagið sitt. „Í gegnum þessar upplýsingar sem ég er að fá í gegnum undirmeðvitundina mína. Undirmeðvitundin, það eru rosalegar upplýsingar sem eru geymdar þar, hún man allt, hún veit allt, allar minningar eru geymdar þarna. Hún veit allt um líkamann, frumurnar, orkuna, hugsanirnar okkar og ef það er eitthvað að þá veit undirmeðvitundin hvað er að, af hverju og hvað þarf að gerast til að fá frelsi frá því,“ segir hún.
„Þannig þegar ég fer að tengjast undirmeðvitundinni og gefa henni réttar skipanir, um að ég vilji fá bata, um að ég vilji fá frelsi, þá byrjar hún strax að vinna að því. Hún byrjar að sýna mér og allt í einu fékk ég bara opinberun, ég man ekki hvort það var í hugleiðslu eða dáleiðslu, að ég væri yfirfull af neikvæðum kvíðaforritum sem voru að skapa kvíðahugsanir sem voru neikvæðar og ágengar, það var að valda meðal annars kvíðanum. Þá fór ég á fullu í að breyta því. endurforrita undirmeðvitundina.“
Sara segist hafa náð að „endurforrita“ sig með dáleiðslu og þannig náð bata. „Ég er algjörlega frjáls í dag,“ segir Sara, sem í þættinum sem sýndur er á Hringbraut klukkan 19:30 og 21:30 í kvöld.
