Hluta Kársnesskóla í Kópavogi hefur verið lokað vegna myglu. Um er að ræða efri hæð vesturálmu byggingarinnar og hefur henni verið lokað vegna myglu sem greindist í einni stofu í álmunni.
Þetta kemur fram í tilkynningu frá Kópavogsbæ. Svæðið sem hefur verið lokað hýsir nemendur í 1. bekk og hluta 3. bekkjar. Nemendum hefur verið komið fyrir annars staðar í skólanum og er stefnt að því að lagfæringum verði lokið í lok desember.
Í tilkynningunni frá Kópavogsbæ segir:
„Forsaga málsins er að á haustdögum varð starfsfólk vart við að loftgæði voru ekki góð á efri hæð í vesturálmu aðalbyggingar skólans. Brugðist var við með því að mæla loftgæði og taka sýni úr gluggum og fleiri stöðum til að kanna hvort um myglu gæti verið að ræða.
Niðurstöður gáfu til kynna að grípa þyrfti til aðgerða. Eitt sýni af fjórum sýndi að um myglusvepp var að ræða. Til að gæta varúðar hefur þegar verið brugðist við og vesturgangi lokað sem fyrr segir. Framkvæmdir hefjast eins fljótt auðið er en skipt verður um gluggasyllur, klæðningar og fleira.
Kársnesskóli stendur við Vallargerði. Í honum eru 660 börn.“
