Rétt fyrir síðustu mánaðamót kvað Héraðsdómur Reykjavíkur upp dóm í máli manns gegn Vátryggingafélagi Íslands. Maðurinn krafðist bóta vegna slyss sem hann varð fyrir í strætisvagni árið 2016 og gerði hann að hans sögn óvinnufæran.
Tryggingafélagið hafnaði bótakröfunni árið 2019 og hafði efasemdir um að atvikið hefði orðið með þeim hætti sem maðurinn lýsti. Sagðist hann hafa kastast úr sæti sínu er strætó fór harkalega yfir hraðahindrun. Tilkynnti hann slysið bæði til heilsugæslu og lögreglu.
Maðurinn krafðist tæplega þriggja milljóna króna í bætur.
Fámennt var í vagninum og ekki tókst að leiða fram vitnisburð sem studdi nægilega vel við frásögn mannsins. Það var ennfremur álit dómara að maðurinn hefði leitt fram fátækleg gögn með kröfu sinni sem þar að auki væru í einhverjum grundvallaratriðum röng.
Var það því niðurstaðan að sýkna tryggingafélagið af kröfu mannsins en málskostnaður greiðist úr ríkissjóði þar sem maðurinn naut gjafsóknar.
