Áslaug Arna Sigurbjörnsdóttir, vísinda-, iðnaðar- og nýsköpunarráðherra, hefur valdið ólgu á samfélagsmiðlum í kvöld með stuðningi sínum við fjölmiðlamanninn Loga Bergmann Eiðsson. Eins og DV greindi frá fyrr í kvöld birti Logi Bergmann færslu á Facebook þar sem hann lýsti yfir sakleysi sínu varðandi ásakanir um meint kynferðisofbeldi sem hann á að hafa beitt Vítalíu Lazarevu í félagi við einkaþjálfarann Arnar Grant.
Áslaug Arna var fljót til að setja hjarta við færslu Loga Bergmanns en hún hefur unnið náið með eiginkonu fjölmiðlamannsins, Svanhildi Hólm Valsdóttur, innan Sjálfstæðisflokksins og er góð vinkona þeirra hjóna. Þessi viðbrögð ráðherrans féllu vægast sagt í grýttan jarðveg hjá netverjum.
Meðal þeirra sem að var snöggur til að gagnrýna ráðherrann var Andrés Ingi Jónsson, þingmaður Pírata, sem að hjólaði einnig í fjölmiðlamanninn fyrir að læsa færslunni í kjölfar þess að allt virtist ætla að sjóða upp úr.
Áhugavert að @logibergmann loki á komment við status þar sem hann lýsir yfir sakleysi sínu – strax og fólk fer að spyrja @aslaugarna hvað hún meini með afstöðu sinni við statusinn.
Er það svona sem þöggunarmenning virkar? pic.twitter.com/5r208g0R5P— Andrés Ingi (@andresingi) January 6, 2022
Áslaug Arna uppskar ekki síst reiði þeirra sem berjast gegn kynferðisofbeldi því að í aðdraganda síðustu kosninga birtist hún, þá sem dómsmálaráðherra, í myndbandi sem gert var til þess að styðja fórnarlömb kynferðisofbeldis. Myndbandið bar yfirskriftina „Ég trúi“ en í því sagðist ráðherrann, sem og aðrir þjóðþekktir þátttakendur, einfaldlega trúa sögum þolenda. Telja gagnrýnendur hennar að sú yfirlýsing rími illa við viðbrögð hennar við máli Loga Bergmanns.
Myndbandið var framleitt af Eddu Falak og Fjólu Sigurðardóttur, sem þá stóðu saman að hlaðvarpsþættinum Eigin konur, þeim hinum sama og Vítalía Lazareva steig fram í og lýsti hinum meintu kynferðisbrotum.
Edda brást við gjörðum Áslaugar Örnu með því að birta myndband á Twitter þar sem hún sést eyða „Ég trúi“-myndbandinu.
— Edda Falak (@eddafalak) January 6, 2022
