Alþjóðaheilbrigðismálastofnunin WHO hvetur ríki heims til að láta af ferðatakmörkunum vegna heimsfaraldursins. Þær felast til dæmis í því að í mörgum ríkjum verður að framvísa bólusetningarvottorði, vottorði um afstaðið smit eða niðurstöðu úr sýnatöku til að komast inn í landið.

Segir WHO að þessar takmarkanir séu ekki nægilega áhrifaríkar til að stöðva útbreiðslu Ómíkronafbrigðis veirunnar. The Guardian skýrir frá þessu.

WHO segir að þessar takmarkanir bæti enn á „efnahagslegt og félagslegt álag í sumum ríkjum“ og þær geti komið í veg fyrir að ríki tilkynni um ný afbrigði veirunnar.

WHO mælir því með því að ef takmarkanir séu viðhafðar þá verði þær byggðar á ákveðnu hættumati.