Ime Udoka, þjálfari körfuboltaliðsins Boston Celtics í NBA-deildinni á mögulega yfir höfði sér langt bann vegna samskipta við kvenkyns starfsmann liðsins. Hið meinta brot snýst um kynferðislegt samband Udoka og konunnar en þrátt fyrir að báðilar aðilar hafi tekið þátt af fúsum og frjálsum vilja þá er um að ræða brot á starfsreglum körfubolta liðsins. NBA-sérfræðingurinn Adrian Wojnarowski á ESPN-sjónvarpsstöðinni greindi frá málinu en talið er líklegt að yfirstjórn Boston Celtics muni komast að þeirri niðurstöðu að setja Udoka í bann, jafnvel allt næsta tímabil.
Ekki er talið líklegt að Udoka verði rekinn frá liðinu. Hann náði ágætum árangri með Celtics á síðasta NBA-tímabili og kom liðinu alla leið í úrslit deildarinnar þar sem liðið beið lægri hlut fyrir ofurliði Golden State Warriors.
NBA-tímabilið hefst um miðjan október en fyrsti leikur Boston Celtics er gegn Philadelphia 76ers þann 18. október næstkomandi.
