Tónlistarmaðurinn Auðunn Lúthersson, sem er hvað þekktastur undir listamannanafninu Auður, var einn helsti popptónlistarmaður þjóðarinnar þar til ásakanir um kynferðisofbeldi komu upp á síðasta ári. Eftir að fjallað var um málið í fjölmiðlum gaf Auður út yfirlýsingu þar sem hann viðurkenndi að hafa farið yfir mörk. Hann sagði þó að flökkusögur um alvarleg afbrot sem höfðu verið á flugi ættu sér ekki stoð í raunveruleikanum.
Auður hefur síðan þá stigið fram í viðtali við bæði Stöð 2 og DV og rætt um ásakanirnar og sjálfsvinnuna sem hann fór í þegar vakin var athygli á þeim. Í viðtalinu við DV sagði hann til dæmis að hann hafi sjálfur gert fullt af mistökum um ævina. „En legg mig fram við að læra af þeim, gera betur og bæta fyrir þau.“
Nú er tónlistarmaðurinn að snúa aftur en hann gerir það í samstarfi við einn ástsælasta tónlistarmann landsins, Bubba Morthens. Á miðnætti í kvöld gefur hann út sitt fyrsta lag síðan fjallað var um ásakanirnar en það ber nafnið Tárin falla hægt.
„Bubbi Morthens og Auður leiða saman hesta sína í nýjum haustslagara. Lagið ber nafnið Tárin falla hægt og er þeirra fyrsta samstarfsverkefni. Stórir gítarar, stríðstrommur og angurvær hljóðheimur einkenna lagið,“ segir í tilkynningu um útfáfu lagsins.
