Hjúkrunarheimili í Taoyuan borg í Taívan hefur beðist afsökunar fyrir að hafa ráðið strippara til að skemmta eldri borgurum heimilisins á uppskeruhátíð. Um er að ræða ríkisrekið hjúkrunarheimili fyrir fyrrum starfsmenn hersins í landinu. Hjúkrunarheimilið borgaði stripparanum til að skemmta 12 íbúum heimilisins sem allir eru í hjólastól. Starfsfólk hjúkrunarheimilisins segir að það hafi ráðið stripparanum til að skemmta íbúunum, sérstaklega í ljósi þess að síðustu tvö ár hefur uppskeruhátíðinni verið aflýst vegna faraldurs.
Myndband náðist af stripparanum er hann skemmti eldri borgurunum en í því má sjá hana dansa, strjúka á sér líkamann og leiða hendi eins gamals manns að brjóstum sínum og klofi. Eftir að myndbandið fór í dreifingu neyddust yfirmenn elliheimilisins til að gefa út yfirlýsingu þar sem fram fyrrnefnd afsökunarbeiðni kemur fram. Yfirmennirnir segjast sjá eftir því að hafa ráðið stripparann í yfirlýsingunni.
Svo virðist þó vera sem það sé ekki endilega eftirsjá eftir því að hafa ráðið strippara, öllu heldur nákvæmlega þennan strippara. Í frétt News.com.au um málið er vitnað í talsmann hjúkrunarheimilisins sem sagði að stripparinn hafi í raun verið „of ákafur“ og að starfsfólk heimilisins muni „passa sig meira“ þegar viðburðir sem þessir verða skipulagðir í framtíðinni.
„Ætlun okkar með þessum viðburði var að skemmta íbúunum og gera þá ánægða. Okkur þykir mjög leitt að það hafi móðgað fólk,“ segir talsmaðurinn enn fremur.
