Eigendur fyrirtækisins í bænum Waterford í Wisconsin-fylki í Bandaríkjanum urðu á dögunum fyrir barðinu á tölvuþrjótum sem skildu eftir fótspor sín á Íslandi. Þetta kemur fram í frétt staðarmiðilsins Kenosha News en í henni kemur fram að bandaríska fyrirtækið, Competitive Heating and Air-Conditioning LLC , sem sérhæfir sig í húshitun og loftræstikerfum, hafi látið hafa af sér um 162.5000 bandaríska dollara , tæplega 23 milljónir króna, í svindlinu.

Það átti sér stað þannig að fyrirtækið, sem á sér langa rekstrarsögur, fékk tölvupóst þann 28. júní frá birgja þar sem farið var fram á breytingar á greiðslufyrirkomulagi. Tölvupósturinn virtist vera frá yfirmanni þess fyrirtækis og var svo sannfærandi að fjármálastjóri Competitive Heating and Air-Conditioning LLC lét blekkjast og millifærði tvær greiðslur, alls tæplega 23 milljónir króna,  inn á hinn nýja reikning.

Málið komst svo upp þegar raunverulegur birgi fór að ýta á eftir greiðslu vangoldinna reikninga. Þá kom í ljós að einn stafur í netfangi hins meinta yfirmanns birgjans, var öðruvísi en hið rétta netfang sem áralöng samskipti höfðu farið í gegnum.

Í frétt Kenosha News segir einn eigandi Competitive Heating and Air-Conditioning LLC að um mikið högg sé að ræða fyrir fyrirtækið. Tekist hafi að endurheimta rúmlega 8 milljónir króna af upphæðinni og þá mun tryggingafélag fyrirtækisins endurgreiða rúmlega 3,5 milljónir króna.

Lögreglunni í Waterford var gert viðvart þann 16. júlí síðastliðinn. Þá kom í ljós að svindlararnir höfðu stofnað reikning 15 dögum fyrr hjá Community State Bank ytra.

Hins vegar var netfangið sem tölvuþrjótarnir notuðu rakið til hýsingaraðila hér á Íslandi. Það hafi gert það að verkum að Waterford-lögreglan mun ekki rannsaka málið frekar en ekki með neina lögsögu hér á landi. Eigendur Competitive Heating and Air-Conditioning LLC munu því þurfa að leita til bandarísku alríkislögreglunnar en ekki kemur fram í fréttinni hvort það skref hafi verið stigið.