Washington Post skýrði frá þessu í gærkvöldi. Ekki kemur fram hvaða kjarnorkuveldi eigi í hlut en skjölin eru sögð lýsa hernaðarlegum vörnum landsins.
Ekki hefur verið skýrt opinberlega frá innihaldi rúmlega 11.000 skjala og ljósmynda sem alríkislögreglan FBI lagði hald á heima hjá Trump í síðasta mánuði en fyrri fréttir Washington Post hafa bent til að leit FBI hafi meðal annars beinst að skjölum um kjarnorkuvopn.
Blaðið segir að meðal skjalanna sem fundust hjá Trump séu skjöl sem þarf sérstaka heimild til að lesa og er hún aðeins veitt ef talið er nauðsynlegt að viðkomandi fái vitneskju um það sem stendur í þeim. Ekki dugir að hafa hæstu mögulegu aðgangsheimild að leyniskjölum til að fá að sjá þessi skjöl, það þarf sérstaka viðbótarheimild til þess. Segir blaðið að sumir af æðstu þjóðaröryggisráðgjöfum Joe Biden hafi ekki haft heimild til að sjá sum af þessum skjölum.
Dómsmálaráðuneytið rannsakar nú mál Trump sem tók leynileg skjöl með sér í óleyfi úr Hvíta húsinu og geymdi þau í Mar-a-Lago.
