Gunnar Smári Egilsson, félagi í Sósíalistaflokknum, skrifar í dag nýja grein í greinaflokki sínum um skattabreytingar nýfrjálshyggjuáranna – „hvernig skattbyrði var létt af fyrirtækjum svo eigendur þeirra gætu dregið meira fé til sín upp úr rekstrinum.“

Greinin birtist á Vísir.is og ber yfirskriftina „Auðstétt verður til. Og þú borgar.“

Gunnar Smári segir að miðað við skattaframtöl fyrir árið 2021 megi gera ráð fyrir því að sveitarfélögin missi um 19 milljarða króna vegna þess að útsvar er ekki lagt á fjármagnstekjur. „Og þá bara vegna tekna 1% tekjuhæsta fólksins. 6 milljarða til til viðbótar ef við tökum fjármagnstekjur annarra með,“ segir hann.

Þá bendir hann á að sveitarfélögin hafi misst 60 milljarða vegna þess að aðstöðugjald fyrirtækja var lagt af, veltuútsvar á fyrirtæki sem endurgjald fyrir þjónustu samfélagsins í sveitarfélaginu.

„Og sveitarfélögin misstu síðan 60 milljarða króna vegna þess að aðstöðugjald fyrirtækja var lagt af, veltuútsvar á fyrirtæki sem endurgjald fyrir þjónustu samfélagsins í sveitarfélaginu.Samanlagt eru þetta 85 milljarðar króna sem létt var af fyrirtækja- og fjármagnseigendum. Og hvernig var stoppað í gatið?“ spyr hann en svarar því sjálfur strax:

„Útsvar á launatekjur var hækkað úr 6,7% í 14,5%. Miðað við útsvarstekjur síðasta árs jafngildir það hækkun upp á 101 milljarð króna. Fyrirtækja- og fjármagnseigendur borga minna en þú borgar meira. Það var markmiðið. Þótt það hafi aldrei verið kynnt svo.“

Greinina í heild sinni má lesa hér.