Fjölskylda konunnar sem lést í skotárás á Blönduósi á sunnudag hefur sent frá sér tilkynningu, þá fyrstu og að því er fram kemur í tilkynningunni, þá síðustu.

„Á sunnudaginn breyttist líf okkar til frambúðar og verður aldrei aftur eins. Við syrgjum móður okkar og faðir okkar er alvarlega særður á spítala. Okkur hafa borist hlýjar kveðjur og stuðningur úr öllum landshornum. Fyrir það erum við þakklát,“ segir í tilkynningunni.

„Það er erfiðara en orð fá lýst að ganga í gegnum það sem við erum að upplifa núna. Það er enn þyngra þegar fjölmiðlar flytja rangar og villandi fréttir af atvikum og ganga nærri friðhelgi einkalífs okkar með myndbirtingum og síendurteknum hringingum í okkur, nánustu vini og ættingja,“ segir þar jafnframt.

Fjölskyldan biður því næst fjölmiðla um að virða friðhelgi einkalífs þeirra, fjölskyldu og heimilis. „Við þurfum frið til að takast á við þetta áfall, til að syrgja móður okkar og hlúa að föður okkar. Því í dag er ekkert mikilvægara en að hann nái heilsu á ný.“

Undir tilkynninguna skrifa þau Sandra, Hilmar, Pétur og Karen.