Sonur hjónanna á Blönduósi, sem ráðist var á með skotvopni í morgun, er laus úr haldi lögreglu. Þetta kemur fram í tilkynningu frá lögreglunni á Norðurlandi eystra

Samkvæmt mbl.is er sonurinn talinn hafa komið fram við skothvellina, er ráðist var gegn foreldrum hans með þeim afleiðingum að móðir hans lét lífið og faðir hans hlaut lífshættulega áverka, og þá ráðist á árásarmanninn og ráðið honum bana í átökum.

Áður hefur komið fram að sonurinn hafi verið gestkomandi á heimilinu ásamt unnustu sinni og ungu barni.

Í tilkynningu lögreglu segir að sakborningi hafi verið sleppt úr haldi að lokinni skýrslugjöf, vettvangsrannsókn sem og öðrum rannsóknaraðgerðum.

Ekki verður gerð krafa um gæsluvarðhald.

Eins hefur unnustu sonarins verið sleppt úr haldi, en mbl.is segir að þetta hafi átt sér stað seint í dag.

Mbl.is greindi jafnframt frá því í dag að samkvæmt þeirra heimildum hafi árásarmaðurinn fengið lausn eða leyfi af geðdeild nú um helgina, en þær heimildir eru þó sagðar óstaðfestar.