Mikið var að gera hjá lögreglunni á höfuðborgarsvæðinu í nótt í kjölfar Menningarnætur. Svo mikið að lögreglan þurfti að vista fólk í fangaklefum lögreglunnar í Hafnarfirði eftir að fangageymslur i Reykjavík fylltust.

Samkvæmt dagbók lögreglu komu upp fjölmörg mál vegna ölvunar og annarslegs ástands.

Um hálf þrjú leytið í nótt var tilkynnt um hnífaárás á Lækjartorgi en þar urðu tveir menn fyrir árás og voru fluttir á slysadeild. Árásaraðilar fundust skömmu síðar og voru vistaðir í fangageymslu í þágu rannsóknar málsins, en mun rannsókninni að sögn lögreglu miða vel.

Fleiri mál komu upp vegna vopnaburðar og segist lögreglan hafa haldlagt nokkra hnífa.

Síðan voru þó nokkrir handteknir grunaðir um akstur undir áhrifum áfengis eða fíkniefna. Þrír af þeim gistu í fangageymslu þar sem þeir höfðu valdið umferðaróhöppum eða slysum og mál þeirra því þarfnast frekari rannsóknar.

Lögregla þurfti svo að aka þónokkrum aðilum heim í nótt sem höfðu drukkið of mikið. Eins voru nokkur slys sem rekja má til ölvunar og mikið um minniháttarmál og tilkynningar.