Manni á sextugsaldri, sem býr á Spáni, hefur verið stefnt fyrir Héraðsdóm Reykjavíkur. Eru gerðar kröfur á hann um að greiða fyrrverandi eiginkonu sinni yfir 23 milljónir króna. Dvalarstaður mannsins á Spáni er hins vegar ókunnur og hefur lögmönnum konunnar ekki tekist að birta honum stefnuna. Er hún því, samkvæmt lögum, birt í Lögbirtingablaðinu í dag.

Kröfur konunnar eru tvískiptar. Hjónin skildu í október árið 2016 og var þá gerður fjárskiptasamningur á milli þeirra. Samkvæmt honum átti maðurinn að greiða konunni rúmlega 18 milljónir króna. Hann hefur ekki staðið við þá skuldbindingu og snýst því stefna konunnar annars vegar um að krefjast uppgjörs á þeirri skuld.

Hins vegar krefst konan hlutar í fasteignafélagi. Jafnframt vill hún að fjárskiptasamningnum verði rift vegna forsendubrests. Maðurinn hafði ekki upplýst konuna um að hann ætti 50% eignarhlut í fasteignafélagi sem átti stórt iðnaðarhúsnæði á Dalvegi í Kópavogi. Húsnæðið var selt á nauðungarsölu og rann hluti af söluverðinu til fasteignafélagsins. Konan telur sig eiga kröfu til 5 milljóna af því söluverðmæti þar sem henni beri 25% hlutur í fasteignafélaginu, þ.e. helmingur af hlut mannsins sem er 50%, á grundvelli helmingaskipta verðmæta milli hjóna við skilnað.

Í tilkynningunni sem birtist í Lögbirtingablaðinu í dag er manninum stefnt til að mæta í Héraðsdóm Reykjavíkur þann 6. september næstkomandi, en þá verður málið þingfest. „Ef ekki verður mætt af hálfu stefnda við þingfestingu málsins má búast við því að útivistardómur gangi í málinu,“ segir jafnframt í fyrirkallinu.