Jóhannes Tryggvi Sveinbjörnsson, sem kallaður hefur verið Stjörnunuddarinn, býður nú erlendum ferðamönnum upp á ferðir til fáfarinna staða í kringum Reykjanesskagann, meðferð við andlegum áföllum, kakóseremóníur, meðferð við þrálátum verkjum, öndunaræfingar og fleira. Er þetta auglýst á Instagram-síðu nuddarans.

Meðal þess sem er í boði er heillíkamsmeðferð  þar sem allur líkaminn er líklega nuddaður.

Jóhannes var í fyrra dæmdur í fimm ára fangelsi í Héraðsdómi Reykjaness fyrir kynferðisbrot gegn fjórum konum sem sóttu nuddtíma hjá honum. Landsréttur þyngdi síðan dóminn upp í sex ár.

Í frétt DV um málið í fyrra segir meðal annars:

„Nauðganirnar áttu sér allar stað á nuddbekk Jóhannesar, en hann rak meðferðarfyrirtækið Postura og sagðist sérhæfa sig í meðferð við ýmsum stoðkerfakvillum. Meðferðin fór meðal annars fram í gegnum leggöng og endaþarm kvennanna.

Á fimmta tug kvenna gáfu sig árið 2017 og 2018 fram við Sigrúnu Jóhannsdóttur lögmann. Rúmlega 20 konur kærðu en að endingu var aðeins ákært í málum fjögurra kvenna.“