Ástæða þess að flugi PLAY til Madrid var aflýst á síðustu stundu, með þeim afleiðingum að keppnisferð stelpnahóps frá danslistarskóla JSB er í uppnámi, var sú að keyrt var á vélina sem flytja átti hópinn. Reynt var fram á síðustu stundu að útvega aðra vél sem ekki tókst og auk þess dróst viðgerðin á vélinni sem keyrt var á.
Nadine Guðrún Yaghi, upplýsingafulltrúi PLAY, segi að henni þyki þetta mjög leiðinlegt. „Auðvitað er ömurlegt af þessi hópur kemst ekki í keppnina en ég hef fulla trú á að þeim takist að finna annað flug,“ segir Nadine. Hún bendir á að ófyrirséð atvik valdi því að flug falli stundum niður og þegar ein flugvél falli út verði keðjuverkun.
Um mál danshópsins er meðal annars fjallað á Vísir.is í kvöld.
„Það er auk þess brjálæðisleg mannekla í fluggeiranum akkúrat núna. Þegar svona kemur upp, eins og það sem gerðist með vélina okkar í dag, þá fer allt á hliðina hjá okkur því við þurfum að koma farþegum hingað og þangað og finna leiðir. Svo eru einhvern veginn allir að reyna að ná í okkur á sama tíma. Þjónustudeildin er á milljón að reyna að sinna öllum. Svo eru stundum bara ekki komin svör en við sendum út sms um leið og við vitum meira.“
Nadine bendir á að aflýst flug séu alls ekki daglegt brauð hjá PLAY heldur séu stundvísi og snurðulausir farþegaflutningar reglan. „Við förum meira en 20 ferðir með samtals um 4.000 farþega á hverjum einasta degi. En þegar ein vél dettur út eins og í dag þá verður keðjuverkun.“
Nadine dregur einnig fram að í júní hafi PLAY verið með 85% stundvísi á flugum sem þykir mjög hátt hlutfall.
„Við erum öll af vilja gerð og það er ömurlegt þegar farþegar lenda í þessu. En við reynum að gera okkar besta í stöðunni,“ segir Nadine og bendir á að þau mál sem rata í fjölmiðla vegna hnökra á þjónustunni lýsi ekki ástandi sem sé dæmigert fyrir starfsemi PLAY.
