Stjórnarkonur Lífs án ofbeldis áttu fund með Ásmundi Einari Daðasyni mennta- og barnamálaráðherra nú í morgun, þar sem rædd voru sameiginleg markmið sem varða hagsmunagæslu barna í heimilisofbeldismálum. Ráðherra lagði mikla áherslu á að hagsmunir barna í þeirra eigin málum trompi allt annað.
Ljóst er að brennandi áhugi er í ráðuneytinu á að gera miklu betur við að efna skuldbindingar stjórnvalda um að setja hagsmuni barna ávallt í forgang, skýra verkferla og skerpa á þeim lögum sem eru á forræði ráðuneytisins. Þetta kemur fram í tilkynningu frá Líf án ofbeldis.
Á fundinum voru ræddar þær brotalamir sem Líf án ofbeldis sér kerfisbundið í málum barna sem koma úr heimilisofbeldi, dæmi um mæður sem hafa þurft að flýja land með börnin sín, börn sem fá ekki áheyrn í kerfinu. Fundargestir voru sammála um brýna nauðsyn þess að skýra samspil á milli barnaverndarlaga annars vegar og barnalaga hinsvegar þegar kemur að ákvörðun í forsjár- og umgengnismálum, þar sem fyrir liggur rökstuddur grunur um ofbeldi gegn barni og nákomnum.
Samtökin fyrir hönd þolenda ofbeldis, treysta því að dómsmálaráðherra, sem er í forsvari fyrir barnalög, muni stíga öll nauðsynleg skref í þessa sömu átt að hagsmunum barna, þegar kemur að þessum umfangsmikla málaflokki sem sannarlega varðar líf og heilsu barna til framtíðar.
Líf án ofbeldis fagnar því að samtalinu sé komið á við mennta- og barnamálaráðuneytið og mun í framhaldinu halda áfram að upplýsa barnamálaráðherra um reynslu brotaþola heimilisofbeldis af kerfinu svo hún nýtist til úrbóta í þeirri vinnu sem er fyrir höndum í ráðuneytinu.
