Um klukkan 18 í gær var karlmaður handtekinn í Laugardal eftir að hann hafði berað sig. Hann var í mjög slæmu ástandi vegna ölvunar og vímuástands og óviðræðuhæfur. Hann var vistaður í fangageymslu og verður yfirheyrður nú í morgunsárið. Í framhaldi verður kannað hvort beita þurfi frekari þvingunarúrræðum vegna háttsemi mannsins.

Þetta kemur fram í yfirliti lögreglunnar yfir helstu verkefni hennar frá því síðdegis í gær.

Átta ökumenn voru handteknir á tímabilinu grunaðir um að vera undir áhrifum áfengis og/eða fíkniefna. Tveir þeirra reyndust vera sviptir ökuréttindum. Tveir eru grunaðir um sölu og dreifingu fíkniefna.

Á sjötta tímanum í gær voru þrír handteknir í Kópavogi grunaðir um að vera með fíkniefni í fórum sínum.

Á tólfta tímanum var karlmaður handtekinn í Miðborginni en hann er grunaður um húsbrot.

Á sjötta tímanum í morgun var tilkynnt um innbrot í fyrirtæki í Hálsahverfi. Skemmdir voru unnar á húsnæðinu og bifreið var stolið.