Í upphafi innrásarinnar voru 400.000 netárásir gerðar á Neyðarlínuna, 112, á einum sólarhring. Fréttablaðið skýrir frá þessu í dag.
Fram kemur að árásunum hafi verið haldið áfram eftir þetta.
Árása af þessu tagi hefur einnig orðið vart í auknum mæli á innviði á hinum Norðurlöndunum og má þar nefna að dönsk orkufyrirtæki hafa orðið fyrir fjölda netárása frá upphafi stríðsins að sögn danskra fjölmiðla. Þegar eitt þeirra greip til þess ráðs að loka fyrir IP-tölur frá Rússlandi fækkaði árásunum mjög.
Guðmundur Arnar Sigmundsson, forstöðumaður netöryggissveitar Certis, sagði í samtali við Fréttablaðið að engar rökstuddar vísbendingar séu um að hóparnir, sem stunda þessar árásir, komi frá einu og sama ríkinu.
Aðspurður um hvort grunur leiki á að Rússar standi að baki þessari aukningu sagði hann: „Vissulega hefur þetta verið holskefla frá því að stríðið braust út.“
Magnús Hauksson, rekstrarstjóri Neyðarlínunnar, sagði að árásirnar hafi ekki valdið tjóni á þjónustu Neyðarlínunnar fram að þessu. „Við krossum fingur og reynum að vera skrefi á undan þrjótunum. Það sem vekur aftur á móti athygli okkar er hvað árásirnar eru tíðar og umfangsmiklar á þetta fámenna land okkar,“ sagði hann.
Nánar er hægt að lesa um málið í Fréttablaðinu í dag.
