Á næstu dögum verður kveðinn upp dómur í Héraðsdómi Reykjaness yfir rúmlega fimmtugum manni sem ákærður er fyrir samtals 17 brot gegn börnum. Brotin eru gífurlega alvarleg og snúast um nauðganir og aðra grófa kynferðislega misnotkun. Brotin eru framin á tímabilinu 2018 til 2021 en meirihluti brotanna var framinn á síðasta ári.
DV hefur ákæruna í málinu undir höndum en aðalmeðferð var 28. apríl og var lokað þinghald. Í samtali við DV vildi lögmaður mannsins ekki gefa upplýsingar um hvort sakborningurinn hefði játað sök eða ekki. Tilraunir til að ná í sakborninginn sjálfan hafa ekki borið árangur.
Samkvæmt ákæru hefur maðurinn haft samband við börn í gegnum samskiptaforritið Snapchat þar sem hann hefur klæmst við þau, sent þeim klámmyndir og fengið þau til að senda sér myndir. Hann hefur brotið kynferðislega gegn barni í bíl og á gistiheimili. Hann hefur fengið börn til að nota kynlífshjálpartæki við kynlífsathafnir, taka upp myndbönd af þeim og láta senda honum.
Meintir þolendur mannsins eru samtals fimm stúlkur undir lögaldri en hann er sakaður um að hafa nauðgað fjórum þeirra og beitt þær allar, sem og fimmtu stúlkuna, margítrekuðu kynferðislegu áreiti.
Maðurinn er einnig sakaður um að hafa undir höndum myndefni af stúlkunum við kynferðislegar athafnir. Einnig er hann sagður hafa sent kynferðisleg myndskeið af einni stúlku til annarra stúlkna án samþykkis hennar, samkvæmt ákæru.
Hann er sagður hafa afhent einni stúlkunni kynlífshjálpartæki og undirföt og fengið hana til að nota tækið og senda sér myndefni af þeirri athöfn.
Gerðar eru einkaréttarkröfur á manninn fyrir hönd stúlknanna fimm þar sem krafist er skaðabóta frá 2,5 og upp í 5 milljónir fyrir hvert barn.
Dómur verður kveðinn upp í málinu þann 19. maí næstkomandi.
