Þorkell Kristján Guðgeirsson, sextugur Íslendingur sem býr í Noregi, hefur verið ákærður fyrir meiriháttar brot gegn skattalögum, bókhaldssögum og peningaþvætti.

Meint brot voru framin við rekstur tveggja fyrirtækja sem Þorkell stýrði en þau eru nú bæði gjaldþrota. Annað var félagið Smíðaland og hitt var starfsmannaleigan 2findjob.

Þess má geta að síðastliðið sumar var Þorkell sakfelldur fyrir hættubrot við rekstur starfsmannaleigunnar en hann lét erlenda starfsmenn búa í verksmiðjuhúsnæði við Smiðshöfða 7. Vistarverum þeirra var lýst sem hættulegum „svefnskápum“. Var Þorkell dæmdur í fimm mánaða skilorðsbundið fangelsi fyrir þetta.

„Þetta var það alvarlegt og í reynd eitt ljótasta mál sem við höfum staðið frammi fyrir að við töldum mikilvægt að leggja okkar kæru fram og í raun er um prófmál að ræða,“ sagði Bjarni Kjartansson, sviðsstjóri hjá Slökkviliðinu á höfuðborgarsvæðinu í viðtali við Vísir.is í fyrra Bætti hann við að hann hefði ekki séð annað eins á 30 ára ferli í slökkviliðinu.

Málið sem hér um ræðir verður tekið fyrir í Héraðsdómi Reykjavíkur undir lok maí. DV hefur ákæru héraðssaksóknara í málinu undir höndum en þar er Þorkell sakaður um að hafa staðið skil á efnislega röngum virðisaukaskattskýrslum fyrir Smíðaland rekstrarárin 2017 og 2018. Er hann sagður hafa oftalið innskatt um tæplega 170 milljónir króna og vantalið útskatt um rúmlega 40 milljónir. Er hann jafnframt sakaður um peningaþvætti með því að hafa aflað Smíðalandi ávinnings af brotunum.

Í rekstri 2findjob er Þorkell sakaður um virðisaukaskattsvik upp á rúmlega 31 milljón króna og svik á staðgreiðsluskilum fyrir rúmlega 42 milljónir. Er hann jafnframt sakaður um peningaþvætti með því að hafa nýtt ávinning af brotunum í þágu rekstrar félagsins.

Samtals nema þessi meintu skattsvik yfir 380 milljónum króna.

Er þess krafist að Þorkell verði dæmdur til refsingar og greiðslu alls sakarkostnaðar. Líklegt er að málið verði til lykta leitt fyrir héraðsdómi fyrri hluta sumars.