„Rússland tapar stríðinu og það er næstum algjörlega óháð því hvað gerist á vígvellinum í framtíðinni.“ Þetta sagði Flemming Splidsboel, sérfræðingur hjá Dansk Institut for Internationale Studier, í útvarpsþættinum P1 Morgen hjá Danska ríkisútvarpinu.

„Þetta átti að vera mjög stutt stríð, það er Kyiv yrði hertekin og rússnesk sinnaður forseti settur í embætti, hernema átti aðra hluta af Úkraínu, halda þjóðaratkvæðagreiðslur og svo framvegis. Svo þeir eru ekki einu sinni á áætlun a, b eða c. Þeir eru kannski á áætlun d ef það er þá yfirhöfuð einhver áætlun,“ sagði hann um stríðsrekstur Rússa.

Hann sagði að Rússland muni meðal annars tapa stríðinu vegna hins mikla mannfalls sem rússneski herinn hefur orðið fyrir: „Það er svolítið óljóst hversu margir hafa fallið. En mannfallið er mikið og það að þeir hafa ekki færst nær hernaðarlegum markmiðum sínum er hernaðarlegur ósigur.“

Rússnesk yfirvöld hafa ekki skýrt frá mannfalli rússneska hersins nýlega en nýjasta talan er 1.351 en það telja vestrænir sérfræðingar og leyniþjónustustofnanir vera víðs fjarri því sem rétt er. Úkraínumenn segja að rúmlega 20.000 rússneskir hermenn hafi fallið en sú tala hefur ekki verið staðfest.

Splidsboel sagði að reikna megi með að rússnesk yfirvöld muni á næstu vikum og mánuðum skýra rússnesku þjóðinni frá hinu mikla mannfalli í smáskömmtum.