Fram að þessu hafa Vesturlönd haldið sig frá því að blanda sér beint í stríðið en hafa hins vegar stutt við bakið á Úkraínumönnum með vopnum og peningum. En eftir því sem stríðið dregst á langinn er eitt og annað sem bendir til að NATÓ geti ekki bara látið duga að senda vopn til Úkraínumanna, heldur verði bandalagið að blanda sér í hernaðarátökin í landinu.
Þetta er mat Claus Mathiesen, sem er lektor við danska varnarmálaskólann og fyrrum hermálafulltrúi í Úkraínu. Hann segir að vegna frétta af voðaverkum í stríðinu og hættunnar á að Vesturlönd muni pirra Rússa mikið geti til þess komið að Rússar ákveði að beina spjótum sínum að NATO-ríki.
Stóra spurningin er hversu lengi Vesturlönd og NATÓ geta staðið á hliðarlínunni og látið nægja að fylgjast með því sem gerist í Úkraínu án þess að blanda sér beint í stríðið?
Flugskeytaárás Rússa á lestarstöðina í Kramatorsk á föstudaginn varð að minnsta kosti 50 almennum borgurum að bana að sögn úkraínska stjórnvalda. Rúmlega 100 særðust. Mathiesen sagði í samtali við TV2 að þessar háu tölur bendi til að Rússar hafi ekki kannað skotmarkið fyrir fram, til dæmis með því að senda dróna til að taka myndir til að sjá hversu margir almennir borgarar voru á svæðinu. Mathiesen sagðist telja að það séu hryllilegir atburðir á borð við þennan sem geti á endanum neytt NATÓ til að blanda sér í stríðið.
Jeg tror desværre vi mkan ende i en krig mod Rusland. Ikke en verdenskrig, andre globale aktører, Kina, Indien med flere, er ikke interesserede.
Det som Ukraine forsvarer, og Ruslands krigsførelse gør, at vi på et tidspunkt kommer til at gå ind.— Claus Mathiesen (@clausmat1) April 8, 2022
Hann segir að eftir því sem stríðið dregst á langinn og fleiri fréttir berast af mannfalli meðal almennra borgara þá geti Vesturlönd neyðst til að endurmeta hvað þau vilja gera og NATÓ verði að spyrja sig hversu lengi bandalagið vilji og geti staðið og látið nægja að fylgjast með. „Það er jú það sem við gerum núna á Vesturlöndum, það verðum við að játa,“ sagði hann.
Annað atriði sem getur skipt máli varðandi þróun mála er sá stuðningur sem Vesturlönd veita Úkraínumönnum í formi vopnasendinga. Á fimmtudaginn sagði Antony Blinken, utanríkisráðherra Bandaríkjanna að nú verði enn fleiri og fullkomnari vopn send til Úkraínumanna. En það getur haft ákveðnar afleiðingar að senda Úkraínumönnum vopn að mati Mathiesen því hann sagði að á einhverjum tímapunkti geti svo farið að „Rússar fái nóg og segi hingað og ekki lengra“.
„Ég get alveg séð fyrir einhverskonar refsingu af hálfu Rússa. Ef ég á að giska á land sem væri upplagt að refsa, þá er það Pólland,“ sagði hann.
Ef svo fer að Rússar geri flugskeytaárás á landamæri Póllands við Úkraínu mun það verða til þess að NATÓ verður að íhuga hvort fimmta grein sáttmála aðildarríkjanna eigi við en hún kveður á um að árás á eitt NATÓ-ríki sé árás á þau öll.
„Eftir því sem stríðið dregst á langinn verða vonbrigðinmeiri og hættan á refsingu eykst. Þessi vonbrigði geta orðið eitthvað sem dregur okkur inn í stríðið, hvort sem við viljum eða ekki,“ sagði hann.
