Mark Milley, formaður bandaríska herráðsins og æðsti yfirmaður Bandaríkjahers, segir að stríðið í Úkraínu geti staðið árum saman. Hann vill fjölga bandarískum herstöðvum og hermönnum í Evrópu.

Þetta sagði hann í gær þegar hann ræddi við bandaríska þingmenn. Hann sagði að aðgerðir Rússa í Úkraínu og kröfur þeirra um að Bandaríkin og NATÓ fækki í herliði sínu við rússnesku landamærin bendi til að um langvarandi stríð og deilur verði á svæðinu og verði ekki aðeins bundið við Úkraínu.

Hann sagðist telja að líklega muni þessar deilur og átök standa árum saman, kannski ekki áratugum saman en að minnsta kosti árum saman. Hann sagðist telja að NATÓ, Bandaríkin, Úkraína og önnur ríki sem styðja Úkraínu muni verða hluti af þessum deilum í töluverðan tíma.

Hann sagði að kröfur Rússa séu ekki ásættanlegar af hálfu NATÓ og að Bandaríkin séu nú kanna hvernig sé hægt að veita meiri aðstoð og þjálfun til ríkja í Evrópu, þar á meðal til ríkja á borð við Georgíu og Finnland, sem eru ekki aðilar að NATÓ.

Milley sagðist einnig telja að Bandaríkin eigi að skoða þann möguleika að fjölga herstöðvum sínum og hermönnum í Austur-Evrópu til að vernda ríki álfunnar fyrir ágengni Rússa.