Gísli Hauksson, athafnamaður sem oft er kenndur við Gamma, hefur verið ákræður fyrir brot í nánu sambandi. Hann er ákærður fyrir að hafa veist að þáverandi sambýliskonu sinni, á heimili þeirra í Reykjavík, og beitt hana ofbeldi. Þetta gerðist í maí 2020.

Fréttablaðið skýrir frá þessu í dag. Fram kemur að í ákærunni sé Gísla gefið að sök að hafa tekið konuna kverkataki, skellt henni utan í vegg og þrengt að hálsi hennar svo hún átti erfitt með andardrátt og hafi fallið í gólfið.

Þegar konan hörfaði inn í herbergi er Gísli sagður hafa farið á eftir henni og gripið ítrekað um handleggi hennar og fleygt henni á rúm. Þetta hafði þær afleiðingar að hún tognaði og hlaut ofreynslu á hálshrygg og brjósthrygg auk fjölda yfirborðsáverka á hálsi, öxl og upphandlegg.

Allt að sex ára fangelsi liggur við brotum af þessu tagi.

Konan krefst þriggja milljóna króna í miskabætur.

Gísli er annar stofnenda Gamma Capital Management. Hann hætti störfum hjá félaginu 2018. Hann átti 30% hlut í félaginu þegar Kvika banki keypti það fyrir 2,4 milljarða sumarið 2018.

Nánar er hægt að lesa um málið í Fréttablaðinu í dag.