Faðir þriggja barna sem brottnumin voru frá smábæ í Noregi í gær og flutt til Íslands staðhæfir í samtali við DV að þeim sé hætta búin. Stundin greindi frá því í dag að börnin hefðu verið flutt með einkaflugvél frá Noregi til Reykjavíkurflugvallar á mánudagskvöld. Móðir þeirra hafi staðið að því en forræði barnanna er hjá föðurnum og má móðirin aðeins heimsækja börnin einn sólarhring á ári.
Móðirin greindi frá ferðalaginu á Facebook-síðu sinni og birti myndir úr einkaflugvélinni sem flaug með börnin til Íslands.
Faðir barnanna sagði í samtali við DV í kvöld að hann hafi tilkynnt málið til lögreglu um leið og hann uppgötvaði að börnin væru horfin. Unnið sé að því að koma þeim í hendur hans aftur. „Ég tilkynnti ránið á strákunum samstundis til lögreglunnar í gær. Lögreglan er að vinna í málinu. Hef lítið annað að kommentera. Ég er að sjáfsögðu að leita réttar míns,“ segir maðurinn.
Aðspurður segir maðurinn að börnunum sé hætta búin: „Þeim er hætta búin. Hver klukkustund skiptir máli.“
Maðurinn segist ekki geta tjáð sig frekar um málið enda sé það á borði lögreglu. Málið er honum afar erfitt: „Ég get ekki rætt þetta meir núna, ég hef tekið svefntöflu…Svaf ekkert síðustu nótt,“ segir hann.
Samkvæmt frétt Stundarinnar rannsakar norska lögreglan málið og hefur haft samband við íslensk lögregluyfirvöld og óskað eftir samvinnu við rannsóknina. Samkvæmt heimildum Stundarinnar hefur norska lögreglan rætt við konuna sem staðfestir að börnin séu í hennar umsjá á Íslandi.
