Á miðjum tíunda áratugnum tryggði Anatoly Chubais vini sínum og samstarfsmanni Vladímír Pútín fyrsta starfið hans innan veggja Kremlar. Hann studdi duglega við bakið á Pútín þegar hann ruddi sér leið til valda en nú er hann kominn upp á kant við Pútín og flúinn land.

Chubais var einn nánasti ráðgjafi Pútíns en hætti nýlega störfum og fór frá Rússlandi. Ástæðan er innrásin í Úkraínu.

Bloomberg hefur eftir tveimur heimildarmönnum að Chubais hafi hætt störfum og flúið land. Hann er hæst setti embættismaðurinn til að segja skilið við Kreml eftir að innrásin hófst. Tass fréttastofan hefur staðfest að hann hafi látið af störfum.

Chubais hafði notið góðs af vináttunni við Pútín og var einn hinna svokölluðu olígarka, það er manna sem hafa auðgast gríðarlega í skjóli Pútíns, og þar áður forvera hans Boris Jeltsín, þar sem spilling og arðrán eru einkennismerkið.

Chubais hafði gegnt mörgum ábyrgðarstöðum eftir að Pútín komst til valda, meðal annars hafði hann yfirumsjón með breytingum á efnahagskerfi landsins.

Sögur herma að hann hafi alltaf haldið góðu sambandi við vestræna embættismenn.

Í síðustu viku sagði Arkady Dvorkovich, aðalefnahagsráðgjafi Dmitry Medvedev, fyrrum forseta og varaforsætisráðherra, af sér embætti sem forstjóri tæknisjóðs í eigu ríkisins. Hann gagnrýndi innrásina.