Joe Biden, Bandaríkjaforseti, ætlaði líklega ekki að draga athygli samsæriskenningasmiða að sér með ummælum sem hann lét falla á fundi með bandarískum kaupsýslumönnum í Washington á mánudaginn.

Ummælin féllu í tengslum við umræður um innrás Rússa í Úkraínu.  „Núna eru tímarnir að breytast. Við munum, það mun verða ný skipun heimsmála og við verðum að vera í forystu. Við verðum að sameina hinn frjálsa heim í því,“ sagði hann.

„Ný heimsskipun“ er áratuga gömul samsæriskenning. Hún gengur út á að elíta, sem samanstendur af glæpamönnum, undir forystu Sameinuðu þjóðanna og annarra skuggalegra valdhafa ætli að koma á einni stjórn yfir jörðinni og verði valdi beitt til þess. Bandarískar stofnanir eru sagðar munu koma að þessu og  telja sumir að þær séu að undirbúa að setja Bandaríkjamenn í útrýmingarbúðir.