Volodymyr Zelenskyy, Úkraínuforseti, birti myndband í nótt þar sem hann ávarpaði þjóð sína og umheiminn. Í því segir hann að Rússar séu nú í miðri „martröð“ því þeir hafi vanmetið staðfestu úkraínsku þjóðarinnar.

„Í suðurhluta landsins hefur svo sterk þjóðernistilfinning leysts úr læðingi, svo mikil staðfesting á því hvað er að vera Úkraínubúi, að við  höfum aldrei séð neitt álíka á götum og torgum. Fyrir Rússland er þetta eins og slæm martröð,“ sagði hann.

Hann sagði að Rússar hafi gleymt því að Úkraínubúar séu ekki hræddir: „Við erum ekki hrædd við skriðdreka og vélbyssur á meðan aðalatriðið er okkar megin, sannleikurinn, eins og nú er.“

Hann sagðist ekki ætla að fara frá Kyiv: „Ég er hér í Kyiv, í Bankova götu. Ég er ekki í felum og ég hræðist engan.“