Skömmu eftir innrás Rússa í Úkraínu lýstu hakkarasamtökin og aktívistarnir Anonymous Rússlandi stríði á hendur og hafa um helgina birt myndskilaboð þar sem forseti Rússlands, Vladimir Pútín, er varaður við því að taka hakkarana ekki alvarlega.
Hakkararnir hafa svo staðið fyrir ýmsum árásum á rússlenskar vefsíður, sjónvarpsstöðva, gagnagrunna og talstöðvarkerfi. Um helgina tókst þeim til að mynda að taka yfir útsendingu sjónvarpsstöðva þar sem þeir vörpuðu myndum sem sýna stöðuna í Úkraínu í dag.
Rétt er að taka fram að Anonymous er sundurleitur hópur hakkara út um allan heim og hafa samtökin síðustu daga kallað eftir því að hakkarar sem styðja Úkraínu ráðist gegn Rússlandi, eða leggi sitt að mörkum eins og þeir geta, í nafni samtakanna.
Í gær bárust fregnir af því að þeim hafi tekist að hakka sig inn á útvarpsstöð rússneska hersins og spiluðu þar lagið Scatman sem hefur verið þekkt fyrir að fara í taugarnar á fólki síðan það kom fyrst út árið 1994.
Russian Military's radio station UVB-76, also known as "the buzzer", has been hacked and is playing "I'm the scatman" amongst other meme songs. Someone is really trolling Russia hard#UkraineWar #ukraine pic.twitter.com/j0snOmr6Uj
— Connie (@ConnieWoofyBoy) February 27, 2022
Eins hafa hakkararnir náð að taka niður mikilvægar rússneskar vefsíður.
Nýjasta árásin tók mið að rússneskum vefmiðlum. Í stað þess að hefðbundin forsíða komi upp þegar miðlarnir eru opnaðir koma nú upp skilaboð frá hökkurunum. Um er að ræða mynd af legstein þar sem á stendur talan 5.300 sem sá fjöldi rússneskra hermanna sem er sagður hafa fallið í stríðinu til þessa.
Russian News agency – Hacked by #Anonymous https://t.co/HAbvVDeEmL
— Anonymous (@UkraineLegions) February 28, 2022
Fyrir neðan þetta stendur á ensku: „Þessum skilaboðum verður eytt, og sum okkar verða rekin og jafnvel send í fangelsi. En við getum ekki setið aðgerðarlaus hjá.
Undirskriftin var svo : „Tómlátir blaðamenn Rússlands“ en líklega eru þó skilaboðin ekki komin frá blaðamönnum þar sem neðst á síðunni má sjá merki Anonymous.
Fyrr í dag mátti sjá, auk ofangreindra skilaboða, eftirfarandi á vefsíðu fjölmiðilsins TASS þegar hann var hakkaður:
„Við hvetjum ykkur til að stöðva þessa geðveiki, ekki senda syni ykkar og eiginmenn út í opinn dauðan. Pútin er að neyða okkur til að ljúga og er að stofna okkur í hættu. Eftir nokkur ár munum við búa við aðstæður á borð við þær í Norður-Kóreu. Hvað græðum við á þessu? Að Pútín verði skráður á spjöld sögunnar? Þetta er ekki okkar stríð, stöðvum hann!“
Vefsíða TASS er þó komin aftur í loftið núna og skilaboðunum hefur verið eytt.
