Guðmundur Heiðar Helgason, upplýsingafulltrúi Strætó bs., deilir nokkrum myndum í hópnum „Samtök um bíllausan lífsstíl“ þar sem snjómokstur er með þeim hætti að ómögulegt er fyrir fólk að nýta biðstöðvar Strætó og virðist sem snjónum hafi hreinlega verið mokað á biðstöðvarnar. „Það er algjör synd hvernig ruðningi er háttað í kringum sumar stoppistöðvar hjá Strætó. Sveitarfélögin á höfuðborgarsvæðinu mættu taka þetta til nánari skoðunar,“ skrifar hann.
Guðmundur Heiðar fær sterk viðbrögð við þessu og margir gera ýmist grátandi eða gapandi hissa tjákn við færsluna. Þá leggja nokkrir orð í belg.
„Þetta er svakalegt. Takk fyrir að deila,“ segir ein.
„Þetta er eiginlega hálf hlægilegt,“ segir önnur.
„Hvenær voru stoppistöðvar fyrir strætó skilgreindar sem geymslustaður fyrir snjóruðning? Strætó ætti að fara fram á það við sveitafélög að þetta verði fjarlægt,“ segir þriðji.
Heiða Björg Hilmisdóttir, borgarfulltrúi Samfylkingarinnar, tekur einnig þátt í umræðunum: „Sammála, vona þið tilkynnið þetta, hljóta að vera mistök.“
Myndirnar sem fylgja færslunni segja meira en mörg orð.