Þorsteinn Eggertsson fagnar áttræðisafmæli sínu á þessu ári. Hann fæddist í Keflavík 1942. Haustið 1957 fór hann í Héraðsskólann á Laugarvatni og þar var Ingimar Eydal bekkjarbróðir hans og síðar herbergisfélagi. Þeir félagar byrjuðu að standa fyrir skólaböllum aðra hvora helgi. Ingimar spilaði á orgel og Þorsteinn söng. Aðallega voru það bandarísk rokklög sem þeir félagar léku. Þar sem Þorsteinn heyrði ekki alltaf textana í útvarpinu byrjaði hann að semja sína eigin texta og syngja við lögin.

Eftir þátttöku í söngvarakeppni á vegum K.K. sextettsins 1960 söng Þorsteinn með hljómsveitinni í tæpt hálft ár. Hann stofnaði síðan hljómsveitina Beatniks með nokkrum vinum sínum í Keflavík.

Hann flutti síðan til Kaupmannahafnar og stundaði myndlistarnám. Hann söng með hljómsveitum þar í landi og kom meðal annars fram á sumartónleikum í Hróarskeldu 1964. Hann var byrjaður að skrifa fyrir Alþýðublaðið á þessum tíma og tók meðal annars viðtöl við Bítlana og The Rolling Stones.

Eftir að hann flutti heim 1965 gerðist hann blaðamaður og byrjaði að semja söngtexta fyrir ýmsar hljómsveitir, til dæmis Río tríó, Dáta og Hljóma. Hljómsveitunum fjölgaði svo sem og textunum og fóru þeir að skipta hundruðum og eru nú orðnir um eitt þúsund.

Meðal þeirra texta sem Þorsteinn hefur samið eru:

Ljúfa líf

Glugginn

Ég elska alla

Heim í Búðardal

Fjólublátt ljós við barinn

Lífsgleði

Dans, dans, dans

Söngur um lífið

Matti Matt og Heiða Ólafs munu flytja þessi lög og fleiri í Salnum í Kópavogi á föstudaginn klukkan 20. Þorsteinn mun sjálfur segja sögurnar á bak við textana og rifja upp eftirminnilega tíma úr tónlistarsögunni.