Kennari sem fékk dæmdar 8 milljónir króna í skaðabætur í Héraðsdómi Norðurlands eystra í vikunni fyrir brottrekstur frá Dalvíkurskóla í sumar, sem dómurinn taldi ólögmætan, er sagður eiga sér langa sögu kvartana og átaka við nemendur. Um er að ræða kvenkyns íþróttakennara. Sumum foreldrum skólabarna á Dalvík blöskrar að í texta dómsins og fréttatilkynningu Kennarasambands Íslands um málið segir að kennarinn hafi flekklausan feril.
Kennaranum var vikið frá störfum fyrir að löðrunga 13 ára stúlku í maí árið 2021. Stúlkan er sögð hafa óhlýðnast fyrirmælum hans og slegið konuna á undan. Foreldrar stúlkunnar gera alvarlegar athugasemdir við umfjöllun um málið, til dæmis umræður um dóttur hennar á samfélagsmiðlum þar sem dregin er upp mynd af henni sem forhertum vandræðagemlingi. Ennfremur gagnrýna þau Kennarasambandið fyrir að virða ekki persónuvernd þeirra en sambandið greindi frá því hvar atvikið hefði átt sér stað, en slíkar upplýsingar eru hreinsaðar úr dómi héraðsdóms. Fyrr í dag fjallaði DV um skrif hjónanna um málið og ræddi við þau:
Hjónin segja að yfirlýsingar um flekklausan feril kennarans stangist á við frásagnir foreldra sem hafa leitað til þeirra og saka kennarann hunsun, einelti og ljót orð í garð nemenda.
Bergljót Snorradóttir átti áður börn í Dalvíkurskóla og segist hún hafa orðið mjög undrandi að lesa um flekklausan feril kennarans. Hún segist gera alvarlegar athugasemdir við þessa lýsingu og segist hafa komið þeim athugasemdum á framfæri við fræðsluyfirvöld á Dalvík. „Ég get staðfest að ég véfengi að hún sé með flekklausan feril og ég geri alvarlegar athugasemdir við þær fullyrðingar. Þar vísa ég til atviks varðandi mín börn fyrir 14 árum,“ segir Bergljót og segist reiðubúin að rekja það mál síðar, í augnablikinu vilji hún bíða viðbragða Dalvíkurbyggðar.
DV hafði samband við Gísla Bjarnason, sviðstjóra fræðslu- og menningarmála hjá Dalvíkurbyggð. Gísli sagðist ekki getað tjáð sig um einstök mál er vörðuðu skólastarfið og hafnaði því að láta hafa nokkuð annað eftir sér um málið.
Samkvæmt heimildum DV hlaut kennarinn ekki formlega áminningu eftir atvik er varðar börn Bergljótar fyrir 14 árum. Hugsanlega, en DV hefur ekki heimildir þar að lútandi, hefur kennarinn ekki verið áminntur þar til kom að átökunum við stúlkuna síðastliðið vor og telst því hafa flekklausan feril í lagalegum skilningi.
Mörgum foreldrum þykir það orðalag hins vegar draga upp skakka mynd af ferli kennara sem þau telja að hafa sýnt sínum börnum ámælisverða hegðun.
