Í inngangi leiðarans segir Aðalheiður að viðhorf lögreglunnar til blaðamanna hafi lengi valdið stéttinni áhyggjum og hafi lögreglustjórinn á Norðurlandi eystra staðfest þessi viðhorf kerfisins með yfirlýsingu í gær þar sem væntanlegar yfirheyrslur yfir blaðamönnunum fjórum eru sagðar hluti af sakamálarannsókn í hefðbundnum farvegi.
„Aldrei í Íslandssögunni hefur blaðamanni verið gert skylt með dómi að gefa upp heimildarmann sinn, heldur hefur Hæstiréttur þvert á móti ítrekað skyldu blaðamanns til að virða þá vernd sem heimildarmönnum er tryggð með lögum. Síðast með fordæmisgefandi dómi árið 2019 í máli Glitnis Holdco gegn Stundinni. Þá hefur ítrekað verið staðfest með dómi að blaðamönnum er heimilt að vinna upp úr þeim gögnum sem þeir hafa komist yfir, ef málið sem um ræðir á erindi til almennings. Íslensk dómaframkvæmd er orðin hefðbundin í málum af þessum toga og rannsókn lögreglustjórans á Norðurlandi eystra er á skjön við hana,“ segir Aðalheiður og bætir við að það eina hefðbundna við rannsókn lögreglustjórans á Norðurlandi eystra sé að meðvirkni með valdinu „hvort sem um er að ræða Samherja fyrir norðan eða mótshaldara Þjóðhátíðar í Eyjum, sem kærði sig ekki um að hátíðin fengi á sig yfirbragð kynferðisbrotasamkomu.“
Því næst víkur hún að Bjarna Benediktssyni, formanni Sjálfstæðisflokksins, og skrifum hans í gær þar sem hann spurði hvort blaðamenn séu of góðir til að svara spurningum lögreglunnar. „Að formaður Sjálfstæðisflokksins, sem er einn valdamesti maður landsins, skuli óumbeðinn stíga fram og kalla þessa valdbeitingu jafnræði fyrir lögum er ekki aðeins forkastanlegt heldur blátt áfram lygilegt. Ríkisstjórnir hafa sprungið af minna tilefni. Aðeins sjúk samfélög kalla það hefðbundinn farveg sakamálarannsóknar að fjölmiðlafólk sitji á sakamannabekk fyrir að upplýsa almenning um ofsóknir sem kollegar þess hafa orðið fyrir starfs síns vegna, á meðan engin eftirmál hafa orðið fyrir þá sem fyrir ofsóknunum stóðu, önnur en þeirra eigin tilraunir til að biðjast afsökunar,“ segir Aðalheiður.
Hún segir síðan í niðurlagi leiðarans að það eitri samfélagið á hættulegan hátt að aðför að fjölmiðlum sé normalíseruð á þann hátt sem lögreglustjórinn á Norðurlandi eystra geri með starfsháttum sínum og yfirlýsingunni sem hún sendi frá sér í gær. „Það eitrar samfélagið ekki síður að herferðir gegn blaðamönnum séu ekki teknar alvarlegar en raun ber vitni. Nú verður eitthvað að breytast. Þetta er nóg,“ lýkur hún leiðaranum með.
