Ögmundur Jónasson, fyrrverandi ráðherra, hefur um árabil talað fyrir því að spilakössum verði lokað í stað þess að rekstraraðilar kassanna séu að græða á veikum spilafíklum.
Hann birtir í dag grein á heimasíðu sinni sem ber heitið „RUV og spilavíti: Undarlegar mótsagnir eða…?“ Þar gerir hann að umtalsefni að ríkisstjórnin vilji taka Ríkisútvarpið af auglýsingamarkaði en á sama tíma séu ríkisstjórnarflokkarnir sammála um að halda áfram að reka spilakassa „… og láta fólk haldið spilafíkn fjármagna byggingar og tækjakaup Háskóla Íslands. Ekkert tal um að klippa á spilavítistekjur og koma þess í stað með stuðning úr ríkissjóði.“
Þá bendir Ögmundur á að tugmilljónir hafi verið greiddar, úr ríkissjóði til þeirra sem reka spilakassana, í svokallaða lokunarstyrki vegna þeirra tímabila sem spilasalir urðu að vera lokaðir vegna kórónuveirufaraldursins.
„Þannig fékk fyrirtækið sem rekur spilavíti (Casínós) Háskóla Íslands 17 milljónir, 121 þúsund 270 krónur í „lokunarstyrk“ á árinu 2020 sem var eins gott, annars hefði verið erfitt að greiða eigendum fyrirtækisins 12 milljónir í arð á því ári. En það tókst, þökk sé ríkissjóði fyrir hönd skattgreiðenda,“ skrifar Ögmundur og spyr hvort þetta séu mótsagnir eða málið ekki hugsað til enda, og vonar að hér sé um það síðara að ræða. Það er Háspenna ehf. sem rekur spilavélar Happadrættis Háskóla Íslands.
